Grenzgänger

Wenn i auf meiner Wolka sitz on zu euch mol nonterspitz mir Dankbarkeit im Herza leit, dass ihr bleibat wo ihr seid. Ohne euch kann i guat leba, hab vom Herrgott doch sein Sega, der woeß wohl, was er an mir hot. Drom jubilier i hier au flott. Laut sing i des Hosianna, bloß schmecka will mir net des Manna, ganz durchgeistigt lob i Gott. Euch da onta gilt mei Spott. Da oba, hier im Himmelreich, sen vor Gott mir älle gleich. Doch für euch, euch Sünder isch d Höll bedeutend gsünder. Mir, mir sen dia Auserwählte on ihr, ihr geltat als Gequälte. Mir sen da oba fein heraus, bei euch goht’s zu, des isch a Graus. Hör Harfaklang on Halleluja, bloß zwoe Sacha fehlat da. Weil, statt Manna möcht i hier a Ripple on zwoe Woezabier. I war wohl doch zu selbstgerecht. Do onta isch es doch net schlecht. Froh ben i, dass des a Traum war. Mir gfallt’s do onta, isch doch klar.